تعالي يا ست الكل اقولك ع كام حاجه مهمين جدا لو هتدمسي فول ف البيت وهقولك كمان ع سر المطاعم اللي بيخلي الفول لونه وقوامه حلووو اووي
اول حاجه تعمليها انك تختاري الفوله اللي لونها فاتح وحجمها كبير،
تعالي بقاا للتدميس انا بدمس بطريقتين والاتنين بيطلعوا حلوين جدا ،
طريقه بنقع فيها الفول وطريقه لا
بس المره دي انا كنت ناقعه الفول من بالليل يعني اقل حاجه 8 ساعات بعد كدا هنشطف الفول كويس اوي وننزل بيه ف الفواله او الحله بس لو عاوزه نصيحتي الفول اللي بيستوي ف الفواله بيبقا احلي بكتير يعني لو معندكيش فواله حوالي تشتري واحده..
المهم هننزل ع الفول بطماطمايه وبصلايه متقطعين ع اربعه وجزرايه مبشوره ومعلقه صغيره كركم وعصير نص ليمونه ونزود مايه سخنه ونرفعهم ع النار يدوب يغلي اول غلوه هنوطي النار خالص ع اقل درجه حراره ونسيب الفول يستوي براحته زي ما ياخد وقت براحته خالص وكل ما يحتاج مايه نزود ميه سخنه ودي اهم حاجه علشان لو زودتي ميه بارده القشره بتاعه الفول هتجلد معاكي،وف نص التسويه هنضيف نص كوب عدس اصفر ونص كوب فول مدشوش بيخلوا لون وقوام الفول حلو اوي ،، اخر حاجه بقا ودي من اسرار المطاعم اللي محدش هيقولك عليها بعد ما الفول يستوي خالص هتجيبي معلقه صغيره نشا ومعلقه صغيره دقيق تدوبيهم ف معلقه ميه وتنزلي بيهم ع الفول ومعاهم معلقه كبيره بابريكا مع التقليب المستمر خمس دقايق واطفي عليه النشا والدقيق بيدي قوام روعه للفول وكمان بيبقا لونه فاتح وجميل ..
شوفي بقا بنص كيلو فول هتعملي كميه قد ايه ،،اعمليه بقا ع الفطار او العشا وبالف هنا وشفا