كترت اوى الفترة دى الأسئلة عن القلاية الهوائية أو ال Air Fryer وده بسبب ارتفاع أسعار الزيت وسرعة استهلاكه
عشان كده هقولكم الخلاصة اللى تساعدكم فى اتخاذ القرار المناسب .
هل هى موفرة فعلا؟
اكيد طبعا موفرة فى استهلاك الزيت لأنها بتستخدم كمية بسيطة جداً وفى بعض الأحيان مش بنحتاج نستخدم ولا قطرة زيت لو نوع الغذاء نفسه بيحتوى على دهون طبيعية.
بس لازم تعرف إن اللى بتوفره معاك باليمين بتاخده منك إستهلاك كهرباء بالشمال عشان نكون واضحين.
لكن لو الغرض منها هو الأكل الصحى وحياة صحية بنسبة دهون أقل مش مجرد توفير اقتصادى فقط فأكيد هى إختيار ممتاز
هل طعم الأكل بيتغير فيها عن المعتاد؟
قولا واحداً أيوة لكن الفكرة بيتغير بنسبة قد إيه؟
فى نوعيات بيكون التغير فيها بسيط وأحياناً مش ملحوظ ويمكن إستصاغه الطعم بسهولة ودى أكيد بتكون خامات ومكونات تصنيعهاجيدة وماركات لها إسم كبير.
وفى نوعيات أخرى الأكل فيها بيكون متغير بشكل أكبر وهكذا بالتدريج لغاية مانوصل لبعض النوعيات اللى ممكن تشم فيها وتدوق كمان طعم البلاستيك او المعادن ومكونات التصنيع الرديئة للقلاية اللى بتتفاعل مع الحرارة وتظهر فى طعم الأكل.
طيب إيه أفضل الماركات اللى ممكن نشتريها ؟
عشان نرد بشكل عملى ومايكنش إعلان وترشيح لمنتج معين عن غيره خلينا نسمع ارائكم في التعليقات “من واقع تجاربكم العملية” عن منتجات انتوا استخدمتوها بالفعل وقولولنا إيه انطباعاتكم عنها سواء كانت إيجابية أو سلبية وهل بترشحوها لغيركم وللا بتحذروهم ما يغلطوش نفس غلطتكم