طريقة عمل كبيبة سوري مقرمشه ولذيذه

مقادير الحشو

_ نص كيلو لحمه مفرومه

_ بصلتين مفرومين

_ معلقه صغيره بهارات

_ معلقه صغيره ملح

_ نص معلقه صغيره فلفل اسود

_ قليل من الجوز وده حسب الرغبه

_ نص معلقه كبيره سماق وده برضو على حسب الرغبه

نيجى بقا لمقادير عجينة الكبيبة

_ نص برغل ناعم

_ ربع لحمه مفرومه

_ بصله

_ نص معلقه كبيره بهارات

_ معلقه صغيره ملح

_ نص معلقه فلفل اسود

_ زيت بكميه مناسبه للقلى

يلا بينا نشوف الطريقه

اول حاجه هننقع البرغل فى مايه وهنسيبه على جنب

هنحضر الحشوه الاول هنسخن شوية زيت وهنحط عليهم البصل المفروم هنقلب المكونات على نار هاديه لحد ما يبقي لونها دهبى

وبعد كدا هنضيف على البصل نص كيلو اللحمه المفرومه

وبعد كدا هنحط التوابل والملح والفلفل الاسود هنستنى لحد ما اللحمه تستوى وبعد ما تستوي هنطفى النار وهنضيف ليها السماق والجوز المفروم وكدا تبقى الحشوه جاهزه معانا

يلا بينا نحضر عجينة الكبيبة هنجيب محضر الطعام هنحط البرغل واللحمه المفرومه على دفعات متساويه وبعد كدا هنضيف البصل المقطع والتوابل الملح والفلفل الاسود بعد ما العجينه تتجانس هنحطها فى وعاء

هنحط عليها دقيق الذرة وتوابل وهنعجنها بالايد

بعد كدا هنصنع حبات الكبة وهنتاكد من طراوة العجينه وممكن نضيف مايه لو العجينه ناشفه

هنجيب طبق ونحط فيه شوية زيت هنغمس صوابعنا فيه واحنا بنصنع الكبة عشان متلزقش فى ايدينا

هناخد جزء من العجينه هنعمل بيه شكل كوره هنعمل حفره فى النص بالسبابه

هنستمر بتشكيل العجينه حتى نحصل على شكل نصف صدفه

هنحط جواها معلقه من الحشوه وبعد كدا هنقفلها كويس جدا

هنشكلها على شكل كبيبة تقليدية

وهنقليها فى كميه وفيره من الزيت وبألف هنا وصحه يا جميل.