ده أحسن وقت لتخزين الخضار لانه
بيسمى (ربيع الخضروات) لان أكتر موسم الخضار بيبقى متنوع وبيبقى تحفة وكمان بقى سعره معقول عن وقت نزوله
القرنبيط من الخضروات المحببة لكتير مننا لكن مش كل الناس عارفة إنها من عائلة الخضروات الصليبية وده معناه إنها فيها مضاد للأكسدة وده بيحمى الجسم من الخلايا الضارة زى السرطنات لا قدر الله يعنى إنها مفيد جداً سبحان الله
وطبعاً ممكن نعملها بطرق كتييير من أول الشوربة للطواجن للقرنبيط المقلى المتعارف عليه حتى المقلى ده بيتعمل بأكتر من طريقة
أولاً:
إزاى نشترى قرنبيط كويس كل ما كانت القرنبيط متماسكة (كانوا بيقولوا عليها زمان قرنبيطة حُرة) كل ما كانت ممتازة وكل ما كانت لونها أبيض شاهى كانت القرنبيطة طازة أكتر زى الصورة كده بالظبط
ثانياً:
أفضل طريقة لتخزينها هى إننا نقطعها بالحجم المناسب ونغسلها كويس ونصفيها ونكون محضرين مياة على النار وأول ما توصل للغليان نضيف ملعقة ملح ونقلب وننزل عليه بالقرنبيط يدوب دقيقتين ونكون محضرين مياة فيها ثلج ونخرجه عليها علشان نوقف عملية التسوية وأول ما تبرد نصفيها كويس جداً ونبردها كمان كويس ونُحطها فى أكياس تلاجه ونفرغ منها الهوا ونقفلها وعلى الفريزر على طول وبكدة حيبقى عندنا قرنبيط طول السنة إن شاء الله