طريقة عمل لانشون الفراخ فى البيت

مقادير لانشون الفراخ

_ ربع كيلو صدور فراخ مفرومه فى حدود 3 قطع صدور رقيقه

_ 2 قطع جبنه مثلثات

_ ربع معلقه صغيره فلفل اسود

_ نص كوب زيت

_ 3 بيضات كبيره

_ نص كوب دقيق إلا معلقه كبيره وممكن نحط بدلها نشا

_ معلقه كبيره بصل بودره

_ معلقه صغيره ملح

_ نص معلقه صغيره بابريكا

_ معلقه صغيره توم بودره

_ معلقه صغيره توم مفروم

_ نص معلقه صغيره زنجبيل بودره

_ 1 مكعب مرقة دجاج

طريقة تحضير لانشون الفراخ

_ هنفرم الفراخ ونحطها على جنب

_ نضرب البيت ومرقة الدجاج والبهارات فى الكبه ونحط عليهم الفراخ ونضربهم كلهم

_ هنحط الدقيق والنشا  ونستمر فى الضرب وبعدين هنحط الزيت براحه على هيئة خيط رفيع واحنا بنضرب المكونات فى الخلاط بدون توقف حتى يظهر السمك ناعم وتقيل وقتها نتوقف عن الضرب

_ هنجيب استرتش ونحط الخليط فيها ونلفه روول ونضغط جامد ونقفل الجوانب وبعدها نلفه مره تانيه باسترتش وفى النهايه نلفه بورق فويل جيدا عشان متدخلهاش مايه

_ هنجيب حله غويطه فيها مايه مغليه ونحط فيها ملح وورق لورا و حبهان ونحط فيها الانشون وبعد ما يغلى نغطى الحله لمدة ساعه وربع ونتركها على النار ونزود المايه كل ما تقل عشان نحافظ على تغطية المايه للانشون باستمرار لضمان نضجه

_ هنطلع اللانشون من الحله ونشيل الفويل وبعد ربع ساعه نشيل الاسترتش وندخله التلاجه ساعتين قبل التقطيع وبعدها يكون جاهز للتقطيع وتقديمه للاكل وبألف هنا.