بسكوت النشادر بالمكنه بالكوب والجرامات
المقادير
كيلو دقيق
٤بيضات
كوب ونص سكر بودر
كوب وربع سمنه ساقعه
معلقه كبيره نشادر
معلقه كبيره ممسوحه بيكنج بودر
ربع كوب لبن
فانيليا
رشة ملح
الطريقه
اضربي السمن مع السكر بالمضرب لحد ما تبقى كريمه بعد كده تنزلي بالبيض والفانيليا وذره ملح وكملي ضرب بالمضرب ودوبي النشادر ف اللبن وتنزلي بيهم ع الخليط بعد كده انزلي بخليط الدقيق والبيكنج بودر وقلبي مش كتير سبيها ترتاح ربع ساعه وشكليها بالماكينه تدخل فى فرن هادي ١٠دقائق
المقادير بالجرام
900 جرام دقيق
320 جرام سكر بودره
320 جرام سمنه
15 جرام نشادر
5 معلقة كبيرة لبن
12 جرام بيكنج بودر
4 بيضة
فانيليا
كحك العيد
المقادير
كيلو دقيق فاخر
٥٠٠ جرام سمنه يفضل تكون بلدي
كوب حليب
ربع كوب سكر بودر
معلقه كبيره خميره
معلقه صغيره بكنج بودر
٥ معالق سمسم
ريحه كحك او روح الموز
رشه ملح
الطريقة
هسخن السمنه وانزل بيها على الدقيق وفي نفس الطاسه اللي سخنا فيها السمنه هنزل بالسمسم واقلبه لحد ما ياخد لون دهبي وانزل بيه مباشره على السمنه والدقيق
على جنب هجيب كوب اللبن وانزل عليه بالسكر والخميره واقلب كويس واسيبهم يتفاعل على جنب
اقلب الدقيق كويس اوي بالسمنه براحه علشان الدقيق كله يتبس بالسمنه واقلب براحه بمعلقه خشب لحد ما يبرد اشتغل بأيدي
هنزل باللبن بعد ما خليط الدقيق يبرد والم العجينه من غير عجن كتير وانزل بالبكنج بودر ورشه الملح واعجن بس مش
كتير لحد ما العجينه تتلم معايا
واغطيها واسيبها ربع ساعه
على طول نحشي بقى ملبن او ساده وبالبصامه أو منقاش امى وندخله الفرن وبس كده .وكل سنه وانتم طيبين.
ملحوظه
فرحى ولادك واهل بيتك لو بكيلو دقيق متقوليش مش عامله كحك عشان الغلا والآخر تروحى تشترى جاهز
بيتي فور
مكونات
كوب سكر ناعم
اثنين كوب سمنه او زبده
اربعه كوب دقيق
ثلاث بيضات
كيس فانيليا
معلقه صغيره بيكنج بودر ممسوحه
للتزيين
شيكولاته خام
شيكولاته فارمسيلا
جوز هند
سوداني مفروم
مربى التين
طريقه
نضرب السمنه او الزبده مع السكر في الخلاط الى ان
يصبح كريمي يوضع البيض بالتدريج واحده واحده مع الضرب المستمر وتضاف الفانيليا
ينخل الدقيق والبيكنج بودر مع رشه ملح ويضاف اليه الخليط السابق يلم العجين باليد ممكن نحتاج شويه
دقيق حسب نوع الدقيق
يترك العجين في التلاجه ربع ساعه ليرتاح
يشكل حسب الرغبه ويوضع في صوانى مدهونه
يوضع في الفرن ساخن مسبقا الى ان ينضج
يترك ليبرد ثم نلصق كل اثنين بالمربي
توضع الشيكولاته الخام على حمام بخار
ثم يغمس بها البيتي فور و يرش عليها الفارماسيلا
او جوز الهند او السوداني المجروش حسب الرغبه
الغريبة
مقادير الغريبه
أربع أكواب دقيق
كوبين سمنه
كوب سكر بودره منخول
ملح وفانيليا إختيارى
في وعاء ، نضع السمنة ونضيف لها السكر البودرة ونخلطهم مع بعض.
بمضرب البيض، نضرب خليط السمن والسكر لمدة 15 دقيقة أو لحد ما قوام الخليط أشبه بقوام الكريم شانتيه.
نضيف الدقيق للخليط، ونقلب المكونات بالراحة، وبالأيد نكمل خلك المكونات ونلم العجينة.
نغطي عجينة الغريبة بكيس، ونتركها ترتاح في الثلاجة مدة ربع ساعة.
وزن الحبة الواحدة من الغريبة تقريباً 10 جرام
نكور عجينة الغريبة بعد ما تخرج من الثلاجة، ونرصها في صيية مٌبطنة بورق الزبدة، ونزين الغريبة بحبة فستق في منتصف كل حبة.
ندخل الغريبة للثلاجة بعد ما تتشكل لمدة 10 دقائق.
وبعدين ندخلها فرن مٌسخن مسبقاً على درجة حرارة 180 في منتصف الفرن على الشبكة، لمدة 4 دقائق، وبعدين ننزل درجة الحرارة لــ 150 ونتركها كمان 4 دقائق.
بعدما الغريبه اخدت اللون الفاتح الجميل،
نصائح لنجاح الغريبة
افضل شئ هو مقادير الغريبة بالكوب وليس الجرامات، لاختلاف الموازين وفيه بعض الموازين مابتديش النتيجه صحيحه ميه ف الميه والغريبه حساسه جداً.
إما نستخدم ميزان جودته عاليه أو نتبع بالكوب 4:2:1 طريقه قديمه ودي طريقه الأجداد بدون ميزان.
في طريقة عمل الغريبة الناعمة بالكوب يٌفضل يكون السكر البودرة جاهز.
عند تسوية الغريبة يٌفضل ندخل حبتين فقط في الصينية للفرن عشان نعرف نظبط حرارة الفرن وقوام العجينة.
سابلية
مقادير السابليه
عجينه السابليه:
ثلاث ارباع كوب زبده فى حراره الغرفه
كوب سكر بودر منخول
ثلث كوب كاكاو
كوبين ونصف دقيق
ثلث كوب لوز مطحون
2 بيضه فى حراره الغرفه
جناش الشوكولاته:
نصف كوب كريمه
كوب وربع شوكولاته حليب
غطاء الشوكولاته البيضاء:
ثلاث ارباع كوب شوكولاته بيضاء
ملعقه ونصف كبيره زيت
عمل السابليه
لعمل جناش الشوكولاتة، في إناء نضع كوب وربع شوكولاتة حليب، ونضيف ليها الكريمة المغلية، وملعقة فانيلا، هغطي الشوكولاتة بالكريمة وأسيبها دقيقتين، وبعدين أقلبها بالويسك.
هفضل أقلب لحد ما أوصل لقوام جناش الشوكولاتة السيلكي الحريرى المطلوب، أنزل الأطراف بالاسبتيله، وأغطي الجناش بورق شفاف، والورق يكون ملاصق للجاناش، ونتركه لمده 3 ساعات حتى يتماسك في حرارة الغرفه
لعمل عجينة السابلية، في العجان أو بمضرب البيض، نضع الزبدة، السكر البودرة المنخول، وننعم الزبدة مع السكر، بودرة الكاكاو، الدقيق، نصف ملعقة صغيرة من الملح، واللوز المطحون، أو ممكن أى نوع مكسرات مطحون زي ما تحبوا، ونخلط لمدة دقيقة لحد ما يبقى الخليط زي الرمل المبلول.
نضيف البيضتين، ونقلب أو نضرب لمدة دقيقة كمان، أو لحد ما العجينة تتلم، أول ما العجينة تتلم نوقف تقليب، هحط العجينة بعد ما أتلمت في ورق شفاف وأشكلها على شكل مستطيل، وأغلفها بالورق الشفاف، وأدخلها الثلاجة لمدة ساعة.
بعد ساعة، خرجت عجينة السابلية من التلاجة، قسمتها نصفين، نصف حطيته في الورق تاني ودخلته التلاجة، والنصف التاني رشيت تحته شوية دقيق وعليه شوية دقيق، وبدأت أفرده بالنشابة، نقلب العجينة ونلم الدقيق تحتها، ونكمل فرد.
بعد ما العجينة اتفردت كويس بسمك 2 مم، هقطعها بقطاعة البسكويت مقاس القطاعة اللى بستخدمها 17 سم، أو قطاعة الدونتس.
لازم نشيل الزوائد قبل ما نحرك البسكويت من مكانه، عشان يفضل شكله جميل وميتبهدلش.
نرض البسكويت في صينية مٌبطنة بورق زبدة، وندخلها الفرن مٌحمى مٌسبقاً، في الرف الوسطاني عل الشبكة، على درجة حرارة 175 درجة لمدة 10 لــ 12 دقيقة على حسب سمك السابلية، السمك اللى انا عملاه أخد سوا 12 دقيقة، لو قللتو السمك هيبقى عشر دقايق تقريباً.
أول ما البسكويت يخرج من الفرن وهو في الصينية، ندهن وشه بقطعة زبدة دهنة خفيفة، عشان نقفل مسام البسكويت من فوق ويبقى طري ومقرمش بعدين.
هنجيب جناش الشوكولاتة بعد أتماسك، ونحط الجناش في كيس حلوني، وبإستخدام قمع مدور 2 مم، أو قمع الإكلير، نحشي البسكويتة بالجناش من الناحية اللى كانت فوق
نحط كمية كويسة من الشوكولاتة، ونحط بسكوتة تانية فوق الجاناش، ونضغطهم على بعض بلفة يمين وشمال بسيطة،
نسيح ثلاث ارباع كوب شوكولاتة بيضا في حمام ماء، ونضيف لها ملعقة ونصف زيت زيتون أو زيت عادي، ونقلبهم مع بعض كويس
نغمس وش البسكوتة في الكوتينج أو غطاء الشوكولاتة البيضا، بس حاولوا الغطا ميوصلش للجناش الداخلي، يعني يدون ندهن وش السابليه.
نزين السابليه بالاسبرينكس الموجودة عندك وأعملى الأشكال اللى تحبيها وأطفالك يحبوها، وألف هنا، وكل سنة وأنتم طيبين.
نصائح لنجاح السابليه
الفانيليا مش لازم تضاف لشئ عليه كاكاو لانه بيمنع الزفاره.
لو الكريمة مش متاحة ممكن تستخدموا نصف كوب حليب مع ملعقتين كبار زبدة
مقادير السابلية بالكيلو
180 جرام زبده فى حراره الغرفه.
100 جرام سكر بودر منخول.
30 جرام كوب كاكاو.
355 جرام دقيق.
45 جرام لوز مطحون.
2 بيضه فى حراره الغرفه.
جناش الشوكولاته:
120 جرام كريمه.
232 جرام شوكلاته حليب.
غطاء الشوكولاته البيضاء:
ثلاث ارباع كوب شوكولاته بيضاء.
ملعقه ونصف كبيره زيت اى نوع زيت.
القراقيش طريقه سهله ومقادير مظبوطه
احلى حاجه مع كوبايه شاي
المقادير
كيلو دقيق ابيض
كوب زيت
نصف كوب سمنه
باكو خميره
٢ معلقه كبيره سكر
كوب ماء دافئ او كوب لبن يعني حليب او لبن رايب حسب الرغبه
رشه ملح
معلقتين كبار سمسم
معلقه صغيره يانسون ومعلقة صغيره شمر محمصين على النار وده اختيارى
طريقه التحضير
اول حاجه نسخن السمن والزيت على النار لحد ما يسخنوا كويس من غير ما يتقدح
هندوب الخميرة مع السكر في كوب الماء ونتركها على جنب لمده خمس دقائق لتتفاعل
هنجيب طبق كبير ونضع فيه الدقيق والملح
والسمسم والينسون والشمر ونقلب كل المواد الجافة مع بعض وننزل بالزيت و السمن السخنه عليها ونقلب بمعلقه خشب لحد ما يشرب الدقيق السمنه واهم حاجه البس يعنى تبسيه كويس وبعد كده ننزل بالخميره
والماء الدافئ ونقلب كويس لحد ما العجينه تبقى لينه من غير تشققات نسيبها ترتاح حوالي 10 دقائق ونكون مغطيين العجينه وتقطعى العجينة وترص في صوانى ونتركها ترتاح لمدة نصف ساعة
وبعد كده تتدخل الفرن على الرف الوسط درجه حراره 180 المده من 20 ل 25 دقيقه او حسب كل فرن وبعد كده ممكن نحط القراقيش تحت الشوايه علشان نحمر الوش لو احتاج
بالف هنا