طريقة عمل البانية الكداب بطريقه سهله وجميله

البانيه الكداب حاجه كده وهم وموفره جدا وطعمها يهبل وكل الكميه دي بصدر فرخة واحد.

مقادير البانيه الكداب

_ 2 من البطاطس مسلوقين ومهروسين

_ صدر فرخه كبير

_3/4 كيلو بقسماط

_ بصله كبيره مفرومه

_ 3 فصوص توم مفرومين

_ نص معلقه صغيره كزبره ناشفه

_ نص معلقه صغيره بابريكا

_ نص معلقه صغيره توابل فراخ وفلفل اسود وملح حسب الرغبه

طريقة تحضير البانيه الكداب

كل الحاجات دى هنفرمها فى الكبه

الخليط هيبقى ملزق فهنبل ايدينا زيت ونشيله فى طبق ونغطيه

وهنسيبه يرتاح لمدة 10 دقايق فى التلاجه وبعدين نطلعه ونحط فى طبق زيت والطبق اللى فيه خليط الفراخ وصينيه وبعد كدا ندهن الصينيه بمسحة زيت ونبدا نشكل لازم نبل ايدينا زيت واحنا بنشكلها ونبتدي نشكل زى شكل البانيه كدا

وبين كل طبقه من الفراخ كيس عشان ميلزقش فى بعضه وبعد ما نخلص الكميه ندخلها الفريزر لحد ما تتجمد لازم تتجمد كويس عشان نحضها فى البيض والبقسماط ومتتفكش مننا وبعد ما تتجمد نطلعها وبعدين نكون مجهزين 3 اطباق

الطبق الاول يكون فيه دقيق وعليه رشه ملح وبابريكا وتوم بودره وفلفل اسود

الطبق التانى يكون فيه بيضتين وعليهم نص كوباية لبن ورشة ملح وفلفل اسود

الطبق التالت يكون فيه بقسماط وعليه رشة ملح وفلفل اسود وبابريكا وتوم

وبعدين لازم نشتغل فى البانيه وهو مجمد ننزل بيه على الدقيق وبعدين البيض وبعدين البقسماط وينزل فى الزيت على نار متوسطه ميتقلبش خالص غير لما ياخد لون من تحت

وبعدين يطلع على مناديل مطبخ وبألف هنا.